Өскемен әуежайының авиациялық қауіпсіздік қызметі оқу-жаттығу өткізді

Өскемен әуежайының авиациялық қауіпсіздік қызметінің қызметкерлері полиция өкілдерімен бірлесіп, әуе көлігіне тыйым салынған заттарды өткізу әрекеттерінің алдын алуға бағытталған жоспарлы жаттығу өткізді. Іс-шара аясында жолаушылар мен багажды тексеру аймақтарында бақылау шаралары күшейтілді. Тасымалдауға тыйым салынған заттар (өткір темір заттар, тез тұтанатын заттар, жарылғыш материалдар, қару-жарақ және оларға ұқсайтын қауіпті заттар) жөнінде қолданыстағы ережелерге жолаушылардың назары аударылды. Сондай-ақ, жолаушыларға авиациялық қауіпсіздік талаптарын сақтау қажеттілігі туралы ақпарат берілді. Мұндай оқу-жаттығулар ұшу қауіпсіздігінің деңгейін арттыру, жолаушылар арасында қауіпсіз мінез-құлық мәдениетін қалыптастыру, сондай-ақ, ұшу кезінде құқық бұзушылықтардың алдын алу мақсатында тұрақты негізде өткізіледі. Әуежай басшылығы мұндай бастамалар қауіпсіздік қызметінің тиімділігін арттырып қана қоймай, әуе кемелерінің бортына тыйым салынған заттарды әкелуге байланысты оқиғалардың санын азайтуға мүмкіндік беретінін атап өтті.